أطرف 10 نصائح لزوار معرض الكتاب 2018
محمد حسن الصيفي
صديقي زائر معرض القاهرة الدولي للكتاب المشتاق لعالم الكتب ورائحتها وإلى المسطحات الخضراء والأطعمة الجاهزة، المستعد للانطلاق إلى المعرض غدًا في دورته التاسعة والأربعين، أُريد أن أنقل إليك خبرة السنوات السابقة، والتي من شأنها تسهيل الرحلة عليك وجعلها أكثر انسيابية وسلاسة:
1. أنت رايح معرض الكتاب في أرض المعارض، مساحة شاسعة من الفراغ هتقطع في المتوسط منها مشي على الأقدام حوالي 10 كم، وبالتالي أعمل حسابك في حاجة خفيفة تلبسها في رجليك تساعدك على المشي بخفة ودون شعور بالتعب والإرهاق وأبعد عن الحاجات اللي نعلها عالي أو صلب، والكلام موجه للذكور والإناث
2. الجو برد، أعمل حسابك في لبس تقيل بس ياريت يكون قطن ونبعد عن الجواكيت الضخمة والجلد طبعًا عشان مش هتتحملهم بعد ربع ساعة مشي، ويوم ما الشمس تقرر تملى السما هتبقى عايز تخبط دماغك في سور الأزبكية.
3. الأكل، أعمل حسابك في أكل من البيت، سواء جاي من محافظة بعيدة أو حتى من القاهرة بعد ساعة أو ساعتين من المشي واللف هتحس بجوع قاتل، ساندوتشين بطاطس محمرة وفوقيهم شوية سلطة هيساعدوك تمامًا لإن البطاطس نشويات فهتخليك تصمد أكبر وقت ممكن، متفكرش تروح منطقة الأكل في المعرض، نصيحة بلاش، أسعار مرتفعة وجودة “…..”
4.بالنسبة للبنات بلاش نظرية كيف تصطادين عريسًا، أنت مش رايحة فرح أماني بنت خالتك، بلاش ميك أب أوڤر، بلاش ميك أب أصلا بعد نص ساعة من المشي تحت الشمس وشك هيقلب لوحة سريالية من لوحات فاروق حسني.
5.لبست لبس مريح وأكلت، ندخل ع المهمة الرئيسية، الكتب، صفي نيتك كده وأنت نازل وأدخل بقلبك على سور الأزبكية، أغطس بكل جوارحك على ترابيزتها، شم ريحة التاريخ وكُتابه وكمان أسعاره!
6.ما تطلعش القائمة اللي أنت محضرها مسبقًا من جيبك، الأسطورة بتقولك مش هتشتري منها حاجة، سيب نفسك للموجة وهترجع بمجموعة كتب تبهرك.
7.أدخل الهيئة العامة للكتاب بعد السور وادخل الجناح المخفض لدور النشر اللي هيكون لأول مرة السنة دي هتلاقي خصومات كبيرة مناسبة للحالة الإقتصادية.
8.مفيش مشكلة لو أنت كاتب أو حتى متابع لأحد الكتاب إنك تروح التوقيع الخاص بيه وتسلم عليه وتمشي من غير ما تشتري الكتاب لو غالي عليك، يكفيك المشوار والتقدير.
9.الشراء قرار صعب جدًا بس مدمنين الكتب بيبقى أسهل حاجة بالنسبة لهم الشراء، تأنَ شوية ومتتسرعش خصوصا في أول الرحلة.
10.خليك قريب من منطقة ال 100 وال120 صفحة، بعد شهرين تلاتة من المعرض الزهوة هتروح وهتلاقي قرار القراءة بيصعب عليك أكتر وأكتر بمرور الوقت، الكتب الصغيرة هتشجعك نوعًا ما عشان هتخلص معاك في يوم أو يومين وهترجع للقراءة وتفتح نفسك وتخافظلك على المعدل، في النهاية أجازة سعيدة ورحلة موفقة وكل سنة وأنتم طيبين.